ROVERSANO (3 luglio 2011).

TE A D CHI SIT E’ FIOL. TRE.

St’an a giami ad murìs tot da e' cheld e inveci no, a sam stè ben. Un'aria... nenca int al quatr e mez, quand ch'avem incminzì a lez i racunt ch'i à presentè a Muntnov, a e' "Premio Spada"... Un'aria ch'us staseva pió ben! E infati la zenta la j à incminzì a ’rivé sò prest... che da ch'l'ora as n'aspitami minch... A lè, fra una storia e ch'l'èta, Maurizio Cirioni u s'à let al poesii ad Nino Pedretti, ch’l'è trant'en, st'an, ch’l’è mort e a l'avem vlù arcurdè (mei a no scurdesal!) e Cirioni ul lez propi ben! I è ste brev nenca i Magalot (u j n'era trì e a sper a d'inzichìj) Giandomenico ch'u s’à let l'Anonimo romagnolo (Pietro Spada), Pierpaolo, ch'là let un su racont e Marco, ch'l'à let dal poesii... Fra un e ch'l'etar u s'è fat sobit al set, ch’as nun sam gnenca dè... E pó via tot int e' prem pelch, quel int la piaza, ch'a vlami santì a lez Bellosi. Giuseppe.

L’era ora. Da pu ch’a l’aspitema! E dato ch'a sami a Cisena, l'à vlù lez dal poesii ad Galli, parché, l'à det, a Cisena una festa de' dialet senza lez gnint ad Walter lan s pó fè, (che Galli ad solit ul lez Ilario Sirri (ch'l'è acsé brev) mo st’an un gn'era). Ciòu. Galli, in ravgnen, a Cisena… A n'e' so miga me... Mo inveci l'è piasù a tot. Parché Galli, ciòu, nenca in ravgnen l'è pó sempra Galli (e un s pò di gnint!). Mo Bellosi, ciòu... oltre ch’là de' curag… e’ bsogna dì che Bellosi l’è propi brev nenca ló e che, leti acsè in Ravgnen, al poesii ad Galli u m'è pers guasi ad santili par la prema volta... E inveci ad dem dè dan... u m'à fat propri una bela impresion... Sé, propri bela... Cumé ch’e’ fos dal robi novi e int e’ stes temp dal robi ch'a li cnuseva za... Dop a Bellosi, Gagliardi, Giuseppe nenca ló, quel ch'l'à scret “E' viaz dl'anma”, l'à let al su poesii... brev.

Pó j à incminzi Del Vecchio, Emiglio e la su moi Annamaria (Bela e breva, mo propi breva… brev nenca ló, mo lia sicur pió bela!) e aventi acsé... Ch'a n’i pos arcurdè tot, che fra lez, cantè, sunè e recitè, in tota la zurneda u i n'è pasè pió ad zinquenta!

Int e’ sgond pelch, dria a la cisa, Theo Pezzi e Elena Giovannini (che lia la j è propi una musicesta! Ad queli che...) j à cantè, e suné (e Theo l'à nenca let al su poesii). E a j avem propi da ringraziè, parché grazie a lujtar avem putù sostiutì Macola, ch'u s'à fat e' bidon a l'utum minud. E ’csè a avem putù fè andé ’venti nenca e' sgond pelch (e nenca ben) e cun dla zenta miga da poch: Pelo (Armando Bonoli), Dino Bartolini, Loris Martelli, Valter Salvi cun i su amigh cantint, al tré dla Caveja (Carla, Daniela, Nadia), che dato ch’aglj avniva da Ravena e nun an li cnusami, e aglj era nenca brevi, a j avem fat fè e’ zir ad tot e’ paes…e diitar, che tot a num i arcord gnenca…

Aglj ot u s'è tachè d’arnov int e' terz pelch, zó in chev a e' paes, cun Franco Mescolini... miga pulpeti! Un ator vera! Ch'u s'a fat “Shakespeare in dialet” (a gratis!). Un'ora e' mez da sbudles da e’ rid! Me, nenca s'al cnos e al sò ch'l'è propri brev… Ciòu, Sakespheare in dialet! Um suneva mel... U i vó mez’ora sol a scriv e’ nom! E pó al robi screti int un’èta lengua e pó fati in dialet… A n'e' sò... E inveci Franco u n'è miga un pataca! L'è un animagliaz da pelchsenich... Furb!... E al cumedi ad Sakespheare al n’è miga queli… No. Ló l'è partì da lé e pó u li ha cambidi... inturzidi... imgavagnedi… L'à fat quel ch'la vlu ló... E l’è avnù fora una roba nova. E l'è stè una roba... a l'ò za det, da sbudles... Che pó u s'è divartì nenca ló... U s'avdeva... Tent ch'u s’à fat nenca "un fuori programma" e u s'à let (in dialet) nenca una storia de’ "Decamerone" (Una storia ch'la j à un significhet… nenca par e' dialet,... e sol par quel u i sareb da scriv emench tre pagini... Magari un'enta volta.). E dop a Mescolini avem fat partì la Tonina Facciani, ch’la s'è spavanteda... "Ou! propi me dop a Mescolini!" E inveci no. Al savemi che la Tonina la j è breva e i pió j è armanzé inciudè int al scarani (chiitar, ciòu, us pò capi, dop un'ora e' mez... i aveva voja nenca ad fè du pas, ad magné... magari andè a pisì…).

Dop ’ve' bbu e' sanzveis ch'u s’à regalé quii ad Montelorenzone e’ "Roversano" (e béi e’ Rvarsen a Rvarsen, la nota, cun tot al lusi dla piena daventi… l'è e’ masum!), avem cius a la granda, cun Lorenzo Scarponi (che par sta volta u s’a fat nenca da presentador), Iuri Monti e quii de' Cantir agricolo: Il "cantiere" rock, ch’i j à ciapè gost e s' à fat fè mezanota (e quand ch'avem cius a sami enca una masa).

Arport un scors ch'ò santì fè a un ad quii de' parcheg. U s'aferma una machina e un dla Basitaglia e fa: -Scusi mi sa dire dov'è il Sasso- (E’ risturent. Il Sasso, da pó ch'u j è il cnos tot, nenca s’lè vers a Montcudroz!). E ló - “E che? Il Tasso?... Ad Tasso?” “No. Il Sasso, il ristorante.” “Il Basso? No. No. Me a ne sò. An l'ò mai santì dì.” Un dé ad dialet e l'eva za pers l'urecia!