6. festa del dialetto romagnolo -- Te ad chi sit e' fiol? -- Villa Silvia di Lizzano 6 luglio 2014

Te ad chi sit e’ fiol? La sesta festa de' dialet rumagnol.

L’è si en che la festa de’ dialet la va ’venti.
A geva ch’as stufami prema… Inveci no. Mei acsé!
Nenca st’an u s’è andè ’venti cun i cambiamint. Nenca st’an un post nov. Un gran bel post: Villa Silvia di Lizzano. La ca in du che d’isteda l’andeva in feri e’ Cardoz. Quel de’ bar… e’ bar Cardoz int e’ viel Cardoz… Giosuè, e’ Poeta!
Os-cia! Propi un gran bel post… ch’i sa fat tot i cumplimint... Peró, a v’la cont dop, i s’à dè nenca una bela futida!
Che pó un bel post, un bel post… Sé… U j è piasù a tot… Mó mé… E sarà ch’a s’ò fat mel… a mè un m’è piasù gnenca una gran masa. Trop finarlin. Par mé l’era mei ‘Rvarsen… ch’l’è pió saibadgh…
Quest par e’ post.
La festa lam pè ch’la sipa comunque avnuda ben.
U j era i poeta pió cnusù dal Rumagna… nenca quii ch’i n’era mai avnù… An fagh i num parché tot i an im fa la pulpeta ch’a tir fora sempra i stes num… Cióu, i è i mei! Al putrò dì nenca mé? St’an alora a n i degh…che tent a i cnusì e al savì za ch’i è brev. L’amancheva sol Nadiani, ch’lè quasi sempra avnù (e al ringraziem ancora)… e e’ bel l’è ch’l’è ’vnù nenca stan… Mó dop a tota ch’la streda ch’leva fat pr avnì só… quand ch’u s’è truvè int tot che casen, ch’u j era… ch’u j era nench la streda quasi ciusa (che inveci ad met la machina int e’ parcheg, che u j era, i li à vludi infilé toti longh a la streda)… quand l’à savù che duveva recitè int e’ pelch cun Oscar (che inveci ad fè scor i poeti e vó scor ló) alora l’à ciapè sò e l’è andè via (e l’à fat ben! che quasi quasi cun ló e vleva ciapè só nenca e’ por Garoia, Radames… ch’a l’avemi cundanè int e’e stes pelch.).
Comunque, a perta i disguid… che i i è stè e i nun sarà sempra… in generel la festa lam pè andeda ben.

A m nun sò fat ches… mó st’an u i era una masa ad zuvan, sia tra e poblich che sora i pelch… E quist ai voi arcurdè ch’i è quasi tot nuv: l’Arianna Ancarani, ch’la ven dal perti ad Faenza; la Silvia Scarpellini e Francesco Gobbi, da Cisena tot du, i lez dla roba ch’u n’è la sua mó i è propi brev; Loris Babbini, dla Carpneda, che nench s’u n’è pió zovan zovan, al voi arcurdè d’istes parché l’è propri un quii ch’e’ dis che mé ló a num l’arcord mai… e sta volta a mé sò arcurdè; Roberto Casadei, ch’e’ ven da Urzon, ch’u n’è un poeta e al poesii un li lez gnenca, mó l’è un personag, forse nenca un pó trp… ch’e’ scor dal robi dla Rumagna... E pó u n’era ench d’itar, tot brev e ch’a i cnusì.
A proposit ad Rumagna, Benventi, Maurizio l’a presentè, par la prima volta “in assoluto” la nova cherta geografica dla Rumagna… ch’u j à mes un strabigh a disegnela, mó ch’la j è propi avnuda ben! U i era nenca una mostra sora “i fumetti” ch’i scor in dialet, ch’u l’à fata Gianluca Umiliacchi… mó ch’un la à vesta guasi nisun parché la era ad dentar.
Insoma… st’an u j era un fom ’d robi…




Nench la musica, ch’la j era nenca i an pasé… mó stan l’à dè fora du ch’an i cnusami: Paola Contini e Vanni Landi. Brev! A j avresuv da sinti! E pó da San Maren al “Bes-ci ufesi”, ch’i j à sintì in puch, parché i à sunè terd, mó quii ch’i è arvanzè in vleva pió andè via! I era int un post un pó sgrazì, parché a l’avem duvù impruvisé int l’utum, (e stavolta avem da ringrazié Oscar, che quand ch’la i vó l ai vó) dato che in du ch’i eva da ès lou, in s’aveva det ch’un gn’ariveva la curenta… I s’à fat sbudlé da e’ rid! Basta dì che al Bes-ci j è tra i “fan” pió rabii ad Gianni Broccoli, ch’u j era nenca ló…
Comunque, ciusa la festa... smuntè tot… tiré via i fil…mes a post tot… U s’è ‘rivat la notizia che par “la location” (e’ post, par chi un scor l’ingles cmé mé) u j era da paghé mel euro! Cumó, se prema dagli elezion e’ sendich l’eva det ch’e’ pagheva ló! Sé. Prema dagli elezion. Mó ‘des agli elezion agli è za pasedi…



Box Contatti
• Web-Mail
Menu sito
  • home
  • associazione
  • Te ad chi sit e' fiol?
  • novità
  • eventi
  • Scarga quel ch't'vù
  • Poeti di Romagna
  • amigh
  • gallerie
  • La lòzla
  • ....
Prossimi eventi
Nessun evento futuro annotato
Scor nenca te
Titolo : santema
Replica # 1 - Par nun l'è Rabazir... e credo, sta per "rigatti...
28/05/2013 - 14:54
Titolo : santema
14/01/2013 - 21:21
Titolo : Gì pù la vosta...
Replica # 3 - grazie per la risposta, in effetti la definizion...
3/03/2012 - 10:40
Mini Tchat
Loading...
Entra in Chat
Info Sito
Utenti online: 1
Visite al sito: 53780
Visite odierne: 10
Record online: 26
(il 17/11/2018 - 10:29)
Up New-CMS 1.16 Valid CSS Valid html 4.01 GNU General Public License Up