Cesena - Rocca Malatestiana - Te ad chi sit e’ fiol 5.

L’è zenqv en ch’a fasem la festa de’ dialet. Um pè ir ch’avam fat la prema. Inveci l’è da e’ domelaenov, a Rvarsen, e’ prem ad loj de’ domelaenov. La smena dop ch’l’è mort Michael Jackson… in America, a Los Angeles…

Stan pó l’è stè l’an di cambiamint: avem cambì post, avem cambì i presentadur… avem scambì cun dagljitar di personag impurtint, che a la festa j era guasi sempra avnù e che stan pr un quel o pr un etar in gn’è putù esi: Franco Mescolini, Ilario Sirri, Denis Campitelli, Giovanni Nadiani, Gianfranco Miro Gori… Un gn’era gnench Camerani ch’u s’è andè a incrichì propi in sti dé!

“Tot sti cambiamint... Cióu. A n’e’ sò…”. Inveci…

E’ cheld u n’à dè dan. U s’è stè ben. Nenca int e’ dopmezdé (ch’avam incminzì int al quatr e mez-al zenqv) us staseva ben. Da e’ mer tireva un vangin ch’e’ daseva gost… La zenta la j è vnuda (una masa) e quii chi à let i su racunt e al su poesii e pè ch’i sipa piasù… dato ch’i j è stè da santì... fin int l’utum. E nenca lou j era una masa.

Pr e’ “Premio Spada”: Enrico Berti, Dauro Pazzini,Carmen Bendandi, Pier Paolo Magalotti, Sergio Celetti,Gino Erbacci, Romano Comandini, Claudio Casadei, Marco Magalotti; e pr e rest: Carla Fabbri, Nadia Galli, Marino Monti, Loris Babbini, Paolo Gagliardi, Mauro Vitali, Rema Zoffoli, Dino Bartolini, Carlo Falconi, Loris Martelli, Antonio Gasperini, Radames Garoia, Marco Magalotti, Lidiana Fabbri, Vincenzo Sanchini, Gabriele Bianchini, Gianni e Paolo Parmiani, Danila Rosetti, Daniela Cortesi, Armando Bonoli (Pelo), Maurizio Cirioni, Sauro Mambelli, Anna Nardini, Valter Salvi, Lorenzo Scarponi, Iuri Monti, Tonina Facciani, Maurizio Grilli, Roberto Mercadini. Pió Maurizio Benvenuti, ch’un gn’eva da l’esi. Su n’um n’è scapè un qualcadun, che sicur l’à da les muntè só in l’utum cmé Benvenuti, a i duvreb ’vè arcurdè tot...Dato che tot i an, un o chlet, um ragna ch’a m é sò scord…

Pó u j era la musica. E ad musica! Gianni Broccoli, brev, ch’u j era ench an pasè, mó un l’aveva sintì nisun ch’i era ciapè via tot par la partida… Acsé stan j à capì quel ch’i s’è pers. Liana Mussoni e Fabrizio Flisi. Brev Fabrizio a sunè, mó la Liana a cantè la j è una roba… da santì… E s’an l’avì sintida andì a sintila. E pó l’è nenca bela. Um dispis pr I blec de’ sabat (al savì ch’i è brev, ormai j è nench famus) ch’i à suné int l’utum, quand che la zenta la incmiziva andè via in prisia (u sera spers la vosa che al naveti al smiteva e’ sarvizi e u n’era vera) i aveva tot paura d’armanzè a pè (mó a qué a sami a la roca, miga a Rvarsen! E’ masum u j è da fè tarsent metar, in caleda, par ‘rivè a la machina!).

Forse l’è stè parché l’aveva incmizì a rinfirischè… Mó s’e’ fos stè sol par quel e’ sareb bastè a scrichis un pó, cum j à fat Massimo e la su murosa, ch’i è stè lé fin int l’utum… e us sareb stè mej ancora!