FAQ

ROVERSANO (1 luglio 2012). TE A D CHI SIT E’ FIOL. QUATTRO.

 

A sam ‘rivat ormai a e’ quert an ch’a fasem la festa ad “Te ad chi sit e’ fiol?” a Ravarsen.

Int e’ pranzipi un l’avreb det mai nisun ch’avresum duré ’csè tent. E inveci a i l’avem fata. A i l’avem fata a rivé fina a qué e a i l’avem fata nenca st’an che, ciòu, l’è stè l’an ch’avem fat pió fadiga di tot.

Prem, un cheld da s-ciupè… Che un cheld acsé da quand ch’l’è ch’uns santiva? E nenca se a Rvarsen us sta ben… mej che ne in chiitar post, ciòu, e' cheld us faseva santì nenca a lé. E l’è stè propi par colpa de’ cheld ch’avem ’vù e' prem problema. Don Luigi, ch’l’aveva d’arvì la zurneda, in cisa, cun e’ ruseri in dialet, in l’à fat avnì só, propi par colpa de’ cheld. Ch’i à ’vù pavura ch’u j avnes un fastidi. Furtona che la Carla e la Nadia aglj è stedi boni ad muntè só a e’ su post… e la zurneda la j è incminzida ben d’istes. La cisa la j era pina e a sò sicur che e’ Signor uns l’è ciapeda gamba. Enzi che, forse, us l’è gududa nenca ad pió.

Finì ad parghé us duveva incminzì cun la festa int e’ pelch zó in chev a e’ paes (in du ch’us sta pió fesch) cun le Storie dell’anno mille ad Franco Mescolini, mo Gianni Broccoli, ch’e’ duveva avnì a muntè tot l’impient un gn’era! E Mescolini un puteva gnench ’spitè ch’e’ duveva andè via! Alora avem smuntè al casì de’ sgond pelch (dria a la cisa; ch’avem fat un gran spet a Oscar Zanotti, ch’l’aveva da imcmizì a lè) e a li avem muntedi zò in chev. Acsé as sam putù divartì cun Mescolini (sol ch’avem fat una sudeda ch’avem’vù da s-ciupè!).

Broccoli (us ved ch’u sera indurment) l’è a’rivat quand che Mescolini l’à fnì. Oscar e’ pisteva che vleva tachè nenca ló. Sol che monta e smonta a n’avam putù taché sobit a lez i racunt de’ “Premio Spada” e an sam rivat a lezi gnenca tot int un post (nenca parché a lez j era una masa: Maura Turci, Romano Comandini, Marco Magalotti, Loris Martelli, Maurizio Benvenuti, Laura Donini, Maurizio Gasperoni, Rino Salvi, Marco Benazzi, Silvio Lombardi, Giuseppe Zarri, Luca Barducci…) e a j avem duvù fè lez un po’ in qua e in là, ch’an sò gnech in du ch’j epa let e gnench si è rivat a lez tot (mo a pens ad sé dato ch’un s’è lamantè nisun).

Int al sia e’ mez al set dla sera as sami bela mes in pera. Int e’ prem pelch l’è taché la musica ad quji de’ “Gorgh scur” (che prema j aveva cantè “La pasion dla Madona” int la cisa) e pó i burdel dla maestra Floriana Tappi (chi è ‘vnù só nench s’l’è za finì la scola) che, in dialet, j à vlù arcurdè “Giovanni Pascoli” (Zvanì). E dop via… un dop a ch’let… Nadiani (ch’l’è sempra bel a santil), Pelo (Armando Bonoli), Franco Casadei…

Int e’ pelch di dria a la cisa: Bartolini, Brunelli, Carlini, Gasperini…

Int e’ terz pelch: Lorenzo Scarponi, Paolo Gagliardi, Gianni Parmiani (ch’a n’é cnusemi, mo l’è propri brev)… Mercadini (ch’l’à let Dolfo Nardini e u s’à fat s-cupè da e’ rid)… Gianni Broccoli ch’là sunè e cantè fina a nota…

Ades che sora a internet i à mes nenca al fotografii dla festa, a vegh ch’u j era un broz ’d zenta, che me (ch’ò ’vù da fè) an gn’aveva gnenca vest ch’i j era!

E' problema pió gros però l’è stè la partida, che aglj ot e mez e’ tacheva zughì l’Itaglia. E ’lora tot i vleva muntè só e’ prema pusebil, par puté pó ciapè via… (e a qué a i l’avem fata, parché avem tachè prema). Mo dop, quand ch’u s’è fat l’ora, via! Ch'j è ciapè via tot! Tot a ’vdéj la partida. Chi a ca. Chi int e’ circul ad Rvarsen. E dì ch’l’era l’ora mej. Ch’us pranzipiva a stè fresch...

Mó me a j e’ geva “No ‘ndì a ’vdéi la partidà. Che dop cun tot cla zenta ch’j i guerda a i zugadur u i ven e’ nervos… in sta ’tenti…”. E infati guerda quel ch’j à cumbiné...

Nun inveci, ch’a sam armast a lé. As sam raduné tot in chev a e’ paes… (in du ch’us ved tot e’ mond ad ciota… tot lusi fina a e’ mer) int e’ fresch, a santì sunè Broccoli e a béi de’ béi. Che al canteni de’ “Glicine” e ad “Montelorenzone” is n’à dè… ch’u j n’è nenca armast.



Stampa  Pubblicato : Lunedì, 6 Agosto 2012 - 08:39
 Ultima modifica : Lunedì, 6 Agosto 2012 - 08:39
 Pagina letta 885 volte

Box Contatti
• Web-Mail
Menu sito
  • home
  • associazione
  • Te ad chi sit e' fiol?
  • novità
  • eventi
  • Scarga quel ch't'vù
  • Poeti di Romagna
  • amigh
  • gallerie
  • La lòzla
  • ....
Prossimi eventi
Nessun evento futuro annotato
Scor nenca te
Titolo : santema
Replica # 1 - Par nun l'è Rabazir... e credo, sta per "rigatti...
28/05/2013 - 14:54
Titolo : santema
14/01/2013 - 21:21
Titolo : Gì pù la vosta...
Replica # 3 - grazie per la risposta, in effetti la definizion...
3/03/2012 - 10:40
Mini Tchat
Loading...
Entra in Chat
Info Sito
Utenti online: 1
Visite al sito: 20673
Visite odierne: 20
Record online: 59
(il 9/01/2023 - 12:06)
Up New-CMS 1.16 Valid CSS Valid html 4.01 GNU General Public License Up